22 Oktober 2021

Iko Nan Tajadi Antaro Indra Catri dan Ali Mukhni, Sabalun Dinyatoan Positif Corona

Daghi kida: Indra Catri (Bupati Agam) & Ali Mukhni (Bupati Padang Pariaman).


PIAMAN – Panyakik nan sangaiak manular, banamo Covid – 19 atau biaso disabuik Novel Coronavirus alias Corona, manjadi hantu bagi banyak ughang. Sabek, virus nantun indak nampak dan alah taraso sajo kalau lah kanai, samo jo acek disawah atau lintah di tangah rimbo; lah badarah je mangko tau.

Virus itu, cukuik mamatikan. Di Indonesia sajo, lah baribu ughang nan jadi korban maningga duya e, alun nan tabariang di rumah sakit lei. Tapi, jan salah lo, dari sakian banyak nan kanai, ado pulo nan cegak; tingga di chek data e di website Gugus Covid-19 nan tasadio di internet.

Virus itu, indak mamiliah korban e. Nan bansaiak dilapie e, nan kayo baitu juo. Nan ketek badan diganyang e, nan gadang badan ndak tantu dek e, virus tu sabana hebaiak penyebaran e.

Mangko, kaba nan sangaiak mangajuikkan baghu – baghu ko, sabek Bupati ughang Piaman atau tapek e Bupati Kabupaten Padang Pariaman dinyatoan positif Corona.

Antah baa keadaan bupati ntu kini. Nan jaleh, kecek Kabag Humas dan Protokol Pemerintahan Kabupaten Padang Pariaman, banamo Anton WT atau Anton Wira Tanjung, Bos Gadang e ntu sadang dipariso dan memang ado kemungkinan akan di kughuang/ diisolasi/ dikarantina, agar panyakik virus e ntu capek cegak dan indak manyebar ka nan lain.

Samantaro itu, kapado Persada Post, Indra Catri nan kini manjabaiak Bupati Kabupaten Agam, mambeberkan pulo curito partamuan e dengan Ali Mukhni. Kecek e, anam aghi sabalun Bupati Padang Pariaman itu dinyatoan positif kanai virus, wek e baduo basuo di ateh kapa tabang.

“Baliau (Ali Mukhni, mukasuik e) kakak ambo. Dan, 6 (anam) aghi yang lalu kami masih basuo. Masih baghagha kutiko batamu di ateh kapa tabang, saat itu kami samo – samo ka Jakarta, hari Selasa patang,” kecek Indra Catri, kapado Persada Post, siang Minggu (23/08/2020) tadi.

“Semoga beliau capek cegak handak e dan pulih baliak. Aamiin ya Robbal ‘Alamin,” tukuak e. (RPG Networks)