Padang – Persada Post | Satantang Pamilihan Walikota Padang 2024 nan kali ko, tasarobok upo e salah sughang Calon Walikota Padang ado nan asli ughang Piaman, banamo DR. H. Muhammad Iqbal, Psikolog. Wee upo e adolah Jubir (Juru Bicara) PKS (Partai Keadilan Sejahtera), arati e ughang nan sangaik dipicayo dek partai nan bahaluan Agamo Islam, ntu.
Dikisai-kisai babaropo sumber informasi nan patuik dijadikan padoman, diantaronyo nan alah dikoranan dek Tabloid Berita Indonesia Raya, bajudul: DR. H. Muhammad Iqbal Putra Asli Pariaman Bakal Calon Walikota Padang. Artikel ntu terbit tanggal 22 Juli lalu, baisi tantang sia si Iqbal (baitu panggilan e satiok hari), politisi PKS nan bisa dikatoan ughang nan cadiak pandai di level nasional kini ko.
Kecek Iqbal, ughang tuo e kaduo e asli sangaiak ughang Piaman. Arati e bana, Iqbal bisa dikatoan asli 100% ughang Piaman lo, indak sompeang sangenek alah e.
“Ughang tuo ambo kadue asli ughang Piaman dan maghantau. Filosofi maghantau ko sangaiak kuek dikeluarga kami. Sahinggo sabagai anak, ambo digadangkan dengan tekad nan kuaik sabagai ughang Minang,” kecek Iqbal, 20 Juli 2024 lalu, disalah-satu hotel di Kota Padang.
“Ambo masih ingek bana wakatu ngenek, umah kami ntu sabagai tampek mangadu ughang-ughang Minang. Ambo pun lah dikenalkan nan namo e budaya badoncek. Acok ambo dibaok dek gaek pai acara-acara perantau Minang. Kalau ndak salah wakatu ntu acara PKDP (Persatuan Keluarga Daerah Piaman), sabab ughang tuo ambo kan pengurus PKDP lo mah,” bongka Iqbal, mancaritoan diri e, kalau sajak ngenek alah dikenalkan dek ughang tuo e tantang organisasi Piaman (Perantau asal Kota Pariaman, Kabupaten Padang Pariaman dan sekitarnya).
Sajak ngenek lo, ughang tuo Iqbal sangaiak mamparhatian pendidikan anak e ntu, tamasuak kakak-adiak e nan lain. Mako kecek Iqbal, wek e berharap lo, generasi penerus atau anak mudo Piaman, dapek juo nek e pendidikan nan layak, jikok paralu sampai S3, seperti nan inyo rasoan parhatian dari ughang tuo e tu.
Jiko dicigok dari profesional e, sabagai doktor nan masih mudo, Iqbal salain maaja dikampus umum, wee tanyato maaja lo di Lemhannas RI (Lembaga Ketahanan Nasional Republik Indonsia), tantang Revolusi Mental dan Kepemimpinan pado Program Pemantapan Nilai-Nilai Kebangsaan.
Untuak diketahui, Iqbal nan lahie pado Tanggal 25 September 1980 ntu adolah anak kaduo dari ampek badunsanak pasangan Sidi H. Marjohan Chaniago,SE dan Yusni Zainal Koto. Asa amak e dari Pilubang, Kecamatan Sungai Limau, Kabupaten Padang Pariaman. Samantaro ayah e, daghi Nagari Batu Kalang, Kecamatan Padang Sago VII Koto.
Dan, Ayah si Iqbal ko ughang sosial bana, wee salain niniak mamak dan aktif kini ko sabagai Ketua Badan Musyawarah Masyarakat Minang (BM3) Kabupaten Deli Serdang, Provinsi Sumatera Utara dan panah juo manjadi Ketua Umum Masyarakat VII di Medan, sarato tamasuak pangurus PKDP di daerah ntu.
Salain nan tasabuik nan tadi ntu, kok dibantang satantang karajo Iqbal nan lain e, diantaronyo adolah parnah manjadi: Staf Konsuler di Kedutaan Besar Republik Indonesia (KBRI) Kuala Lumpur (Tahun 2006-2007), Consultant di International Organization for Migration/ IOM (Tahun 2007-2009), Consultant/ Reseacrh Leader di Australia Nusa Tenggara Assistance for Regional Autonomy (ANTARA) – Tifa Foundation (Tahun 2010-2010), Research Asisstant di Asia Research Institute, NUS Singapore (Tahun 2011), Tenaga Ahli/ Konsultari di Kementerian Perencanaan Pembangunan Nasional/Bappenas (2011-2012), Tenaga Ahli di Dewan Perwakilan Rakyat/ DPR RI (2011-2014), Ketua Tim Peneliti di KAP End Line Survey UNFPA Project-Kementerian Perempuan dam Perlindungan Anak (Tahun 2013), Tenaga Ahli Wakil Ketua MPR RI (2015-2023), Ketua Program Studi Psikologi di Universitas Mercu Buana (2012-2021), Dekan Fakultas Psikologi di Universitas Mercu Buana (2016-2021), Dosen tetap/ Lektor Kepala (Associate Profesor) di Universitas Paramadina (Tahun 2021-2023).
Salain itu, Ketua/ Rektor di Sekolah Tinggi Ilmu Ekonorni (STIE) Swadaya Jakarta (Tahun 2021-2023) dan Pengajar Karakter Bangsa dan Revolusi Mental di Direktorat Pemantapan Nilai-Nilai Kebangsaan Lemhannas RI (Tahun 2017-2023).
Sabana banyak dan penting-penting sado alah e karajo Iqbal ko. Mako e, banyak ughang yakin, jikok Iqbal ko tapiliah nanti jadi Walikota Padang, kamajuan dan maso depan emas akan didapek dek Kota Padang, sahingga masyarakaik e makmur dan sejahtera, jadi e. (Rico AU Dato Panglima)
