INDAH Cargo, lah mandunia kini. Sabuah perusahaan nan bergerak diusaho jasa cargo alias anta japuik barang dan sajenisnyo. Yang punyo perusahaan ntu adolah anak ughang Kecamatan V Kampuang Dalam, Kabupaten Padang Pariaman, Provensi Sumatera Baraiak, banamo H. Arisal Aziz, nan akrab disapo Jo Sal.
Mandirikan dan marintis Indah Cargo ko, banyak pulo suka dake e. Indak samudah mambaliakkan talapak tangan. Sabaub, dulu panah Indah Cargo ko hampia jatuah lai, tapi Jo Sal mandapek patunjuak nan indak inyo duga lo. Wek e rubah pola dan niaik, akhie e jalan baliak dan bakambang co nan nampak kini ko, gadang dan alah mampu bersaing hingga kalua nugari, salah satu diantara e Malaysia – Indonesia.
Manuruik info nan panulih sempat tarimo dulu, wakatu dakek kabakeh Jo Sal ko, sabagian saham Indah Cargo indak inyo nan punyo lai, tapi anak yatim. Yaitunyo anak-anak yatim nan dibina satiok cabang Indah Cargo di Indonesia ko, mandapek santunan, beasiswa dan lain sabagainyo dari sebagian pandapatan Indah Cargo dan produk-produk lainnyo nan tagabuang di Indah Group. Arati e, Jo Sal ko indak inyo jo anak bini e je nan manikmati keuntungan Indah Group ko.
Manyoal PKDP (Persatuan Keluarga Daerah Piaman), organisasi kabanggaan ughang Piaman, Jo Sal dulu panah tabatiak dihatinyo, baa organisasi nantun bisa bajalan; sehaiak operasional e dan indak kalah penting e mambarikan manfaat langsung kapado ughang Piaman di parantaun dan dikampuang halaman.
Arati e bana, PKDP ko harus mampu manjadi solusi dan indak kalebuik tunja je soal politik dan hal – hal nan indak jaleh, sarato indak bamanfaik lain e.
Kecek Jo Sal tu ka panulih dulu, wek e ingin satiok DPW (Dewan Pimpinan Wilayah) dan DPD (Dewan Pimpinan Daerah) dimanopun PKDP ko barado, handaknyo bakantuo nan agak ghancak dan ado pulo usaho nan bajalan satiok hari e. Sahingga, kutiko ado ama baiak atau ama buruak, tingga mancabuik je dari khas nan alah ado dari kauntuangan usaho ntu.
Mako e, dek Jo Sal ko punyo usaho cargo, kecek e, dicaghi kantuo DPW dan DPD PKDP ko ruko duo lantai; nan lantai bawah e, jadian tampek usaho, salah satu e Indah Cargo. Lalu, lantai duo e jadian kantuo pangurus DPW atau DPD.
Sahinggo e, ughang nan dipicayo manjago kantuo PKDP ado pulo balanjo e, indak manuang-manuang je dikantuo, ado kegiatan dan ado pemasukan. Baitu pulo dengan keuntungan usaho tadi ntu, otomatis masuak ka khas pangurus DPW atau DPD masiang-masiang.
Itu baghu ciek program nyeh. Tapi, banyak program-program PKDP lain e nan sempat wek e bayangan dek Jo Sal tu. Misal sosial, kan wek e banyak zakaiak nan dibagian tiok tahun, jumlah e ndak sangenek doh. Nah, sasuai aturan penyaluran dan panarimo zakaiak, tantu bisa pulo diarahkan ka dunsanak PKDP yang ado diparantauan, yang alun baruntuang keadaan ekonomi e.
Inti e, Jo Sal ko nandak bana, baa PKDP ko baubah lah handak e. Jan kalebuik tunja ndak jaleh je. Untuang-untuang e, pado Mubes VI (Musyawarah Besar ka anam) PKDP tanggal 3 Maret 2023 nan kadiadokan bisuak, dapek tajadi parubahan di PKDP handak e.
Dan, Jo Sal ko kaba e alah siap lo maju mancalon untuak Ketum (Ketua Umum) DPP (Dewan Pimpinan Pusaik) PKDP, asa lei banyak pulo nan maju di Mubes ntu. Mukasuik wek e tu, PKDP ko yo sumarak dan hebat handak e; ado antusias mambangun basamo, jadi indak wek e je nan kareh angok, tapi ado juo nan lain pulo nan basumangaik.
Panulih Opini: RICO AU DATO PANGLIMA/ Direktur Eksekutif POLEGINS (Political and Legal Institute)
