“Uda Fadli (suami) Uni, kalau sempat indak jadi badiri Kota Pariaman ko Tahun 2002 dulu, mungkin bacakak samo kakak e. Karano, Uda mamakai pitih kakak e, untuk biaya kawan – kawan bulak – baliak ka Jakarta, maurus baa Kota Pariaman ko disetujui. Alun lai, sampai Uni dan kawan – kawan aktivis lainnyo batanggang tujuah hari tujuah malam dan mendapat pertentangan dari sebagian ughang – ughang Pariaman, yang indak setuju Kota Pariaman ko badiri,” kuak Fitri Nora, SE, MM, Ketua DPRD Kota Pariaman kapado Redaksi Persada Post, pado suatu kesempatan wawancara satantang sejarah tagak badirinyo Kota Pariaman, alun lamo ko di umah dinaih e.
Agak balinang aie mato Fitri Nora, kalau panulih batanyo baa sejarahnyo badiri Kota Pariaman tu. Sabab, perjuangan mandirikan Kota Pariaman ntu, indak lah mudah dan baik – baik sajo. Kini, Kota Pariaman lah segeh, lah banyak lo dapek pujian dari mulai tingkek nasional hinggo internasional.
Sahinggo, dengan badirinyo Kota Pariaman, mangko tagak pulo Pemerintahan Kota Pariaman; tantu diisi dari mulai penjabat Walikota (Wako) hingga tingkek desa dan kalurahan, tamasuak 20 orang untuk quota Anggota DPRD Kota Pariaman.
Makonyo, hal yang sangaiak wajarlah, Wako Pariaman, penjabat lainnyo sarato Anggota DPRD Kota Pariaman nan sadang duduak lamak kini ntu, batarimo kasih ka Fitri Nora, lakinyo/ suaminyo sarato pandiri Kota Pariaman dulu ntu. Kok indak bisa batarimo kasih, tantu indak sasuai jo pasan Soekarno (Presiden RI 1), tantang ‘JASMERAH’: Jangan Sekali – Kali Melupakan Sejarah.
Kalau lah lupo jo sejarah, itu samo sajo ibaraiak ‘kacang lupo jo kulik e’ atau ‘keong lupo jo cangkangnyo’, mako itu adolah parbuatan nan indak rancak dan indak baradab sarato malupokan sejarah e sughang.
Kini, si Pendiri Kota Pariaman, Fitri Nora, sadang digaduah jabatan e di parlemen (DPRD) di posisi sabagai Ketua DPRD Kota Pariaman. Apo salah e Fitri Nora, sahinggo dibuek bana saroman itu. Adokah Fitri Nora mancilok, korupsi atau apo lah namo, kan indak ado?
Manga inyo harus dilengserkan dari amanah nan alah ditompangkan dek ughang Pariaman kapadonyo, apo lai Fitri Nora alah pulo mandapek suagho nan paliang banyak pado Pileg (Pemilihan Legislatif) 2019 nan lalu.
Sungguah, jikok sabana tajadi dan jadi Fitri Nora ko dilengserkan dari kursi e sebagai Ketua DPRD Kota Pariaman, tantu lah habih raso di Kota Tabuik (julukan Kota Pariaman) ko. Sabab, sabana e pandiri tu lah nan paling tahu, baa bana Kota Pariaman ko kamungko e.
Jan sampai nanti, tabongka pulo, kalau dibaliak upayo malengserkan Fitri Nora tu ado main – main pitih atau main – main indak sehaiak lainnyo, ka jadi apo Kota Pariaman ko salanjuiknyo.
Ibaraik pasan nan tuo – tuo di kampuang; Jan Sampai Jalan Diasak dek Urang Lalu. Mangko disitu kito alah lengah dan akan mandapek kesenggaraan pado akhienyo. (*)
Oleh: Rico AU Dato Panglima/ Sekretaris Jenderal (Sekjend) DPP IP3 (Dewan Pimpinan Pusat Ikatan Pemuda Peduli Pariaman)
